行行有故事系列之 我係一個巴士車長
新手上路：講真有苦有樂
講到香港嘅公共交通，巴士絕對係大佬級嘅存在，幾乎每個香港人都搭過。話說回來，我估計至少有95%嘅香港人都搭過巴士，但真係親手揸過巴士嘅又有幾多個？我係一個新手巴士車長，入行僅三個月，年資淺，但已經感受到呢份工嘅辛酸同樂趣，真係唔做過都唔知。
由揸小型巴士跳槽揸雙層巴士：人生大轉彎
其實我之前有揸車經驗，不過係揸私家車同小型巴士。那時我從來無想過自己會變成巴士車長，因為巴士車長喺我印象入面就係：車大、輪班辛苦、日日要面對一大堆乘客，壓力如山大。所以我一直對呢份工有啲抗拒，甚至覺得自己唔會考慮呢個職業。
世事無絕對
點知有一次同班友食飯，傾開工作同收入嘅話題，其中一個朋友係巴士車長，佢話而家巴士公司請緊人，時薪高達136蚊，仲有其它福利，收入真係唔錯。佢仲鼓勵我話：「你本身就揸開車，不如試下揸巴士啦，你實得架，而且人工比你而家高啲喎！」我當時心入面有啲掙扎，畢竟呢個係我一直唔想做嘅工作。諗咗一個星期，我決定去試吓，點知就咁一腳踩咗入去巴士車長行列。
新手上路：9日訓練到正式開工
上完9日嘅駕駛訓練，我就正式做巴士車長。呢三個月嘅經歷真係令我明白，呢份工唔係淨係揸車咁簡單。路面亂七八糟，因為巴士車身長轉彎要留意車身左右，乘客嘅要求、回答乘客嘅問題，突發情況一大堆，責任好重，要瞻前顧後，開門閂門，仲要睇吓啲人坐定未，行李擺好未，門邊有冇人，真係要顧好多嘢，我都擔心自己搞唔掂，而且喺馬路上面基本上係冇車會讓巴士，其他車輛亦唔想跟住駕巴士後面，因為巴士可以話係起步慢又行得最慢，快到盡都係行得70公里，所以揸巴士真係好需要耐性同忍耐力。
巴士公司、司機同乘客：三腳架缺一不可
講真，巴士公司、司機同乘客之間嘅關係好似三腳架，少咗一個都企唔穩。無乘客搭巴士，巴士公司點生存？無巴士公司，車長點有工開？同樣，乘客想搭車但無車長揸，巴士都係廢鐵一架。所以呢三個角色真係互相依賴，缺一不可。
車長與乘客：有禮貌、互相尊重最緊要
喺呢三者入面，車長同乘客嘅互動最直接。每次埋站、上車、落車，都係一個小小嘅交流時刻。車長準備埋站時會望實站頭有無人要上車；乘客就揮手示意要上車，咁就連繫起來。
如果你每日返工時間都差唔多，十居其九會同一個車長見面。呢啲日常互動其實好有意思，只要大家互相有禮貌、尊重同體諒，搭車都可以變成一件愉快嘅事。
巴士車長嘅日常：早、中、夜更大不同
巴士車長嘅工作時間通常分早更、中更同夜更。早更車長凌晨就要出動，中更就朝早10點後開始，夜更就下晝2點後開工。每個更次都有不同，例如早更要凌晨起身返工，天未光就要準備去接頭班車，中更就天光開工至天黑收工，夜更就要做到凌晨至收工，佢嘅辛苦之處只有佢自己至知。
車長嘅辛酸：唔明白嘅苦衷
做巴士車長，真係經常會遇到啲無奈嘅事情。例如有啲乘客明明係等緊車，但又唔留意車到未，淨係掛住耷低個頭玩電話，到聽到有車聲至望下，都仲要唔肯揮下隻手示意要坐車，司機望到佢嘅舉動埋站接佢，都仲要比佢閙，如果個車長當睇唔到佢，最起碼唔使比人鬧，係咪先！自己顧住玩電話，錯過咗班車。見到駕車開走咗，佢哋就怪車長唔停車，（飛站），之後例牌投訴。又有啲好似同巴士車長有仇咁，未上車就已經留意有乜嘢可以鬧，我覺得呢啲人根本係嚟搞事，講真，我哋車長點可能每個站都停低開門問「有無人上車」呀？呢啲情況真係令我覺得有啲既冤枉又憤怒。
可能啲乘客會因為一次唔好嘅經歷，就對所有車長有偏見。例如某個車長可能態度唔好，乘客就覺得全部司機都係咁。呢啲對我黎講真係唔公平，因為每個車長都係獨立個體，點能夠因為一個人而錯怪所有人呢！
乘客嘅角度：對車長、巴士服務有要求
當然，乘客對巴士服務都有期望。巴士公司加價但班次唔準、車長黑口黑面、態度又差、揸車唔夠穩定，坐車好似要睇你面色咁，甚至有啲車長唔熟路行錯路，而且確實有啲車長真係好冇禮貌，呢啲問題真係會令乘客唔開心，所以我亦理解乘客充滿怨氣嘅原因，不過，乘客都要明白，呢啲唔愉快可能只係某個車長或者某次情況引起。一次唔好嘅經歷唔應該變成對所有車長嘅偏見。講到底，我相信每個車長都努力想做好啲，起碼我自己會希望每一個有緣份坐我車既乘客都坐得舒服，開心愉快咁坐呢程車。
多啲理解，多啲和諧
總括嚟講，巴士公司、車長同乘客之間係一個互相依賴嘅關係。巴士公司提供服務，車長負責揸車，乘客靠巴士出行。只要大家多啲理解、包容同尊重，呢個巴士系統就會運作得更好。
做咗三個月巴士車長，我真係感受到呢份工嘅困難同無耐，但同時都有樂趣同滿足感，確實有好多人上車會同車長講早晨，我當然回應返早晨啦！每次順利完成一程，將乘客安全送到目的地，心入面都開心嘅。希望將來可以睇到車長同乘客都以尊重同體諒為先，每個車長都比到乘客更好嘅服務啦！
「坐車揮揮手，禮貌大家有」
祝：大家路路暢通，旅途愉快
所有文章均來自於網絡或不同的作者，不代表本站立場，如有侵權或其他問題請即聯繫我們admin@std.news，我們會立即處理。
