一盅兩件

我相信香港好多人都會經常去茶樓嘆返一盅兩件，去飲茶嘅好處其中一樣就可以食好多唔同嘅點心，我都係一個好鍾意食點心嘅人，我鍾意食點心嘅原因係因為細個嘅時候我媽媽朝早會帶我去茶樓食一個盅頭飯，食完之後我就會去返學。

而我記得約70年代賣點心嘅人唔係用車仔推點心，而係用一個盤張蒸好嘅點心放喺個盤上面， 用條繩將個盤孭喺個身上一路行一路叫住點心名，當啲人聽到鍾意食嘅點心嘅時候就會叫嗰個人攞個點心畀佢，而當時啲人唔係用點心紙記數，而係食完將啲點心擺枱面當你要埋單嘅時候會有人過來幫你逐碟計。

當時有些人去茶樓飲茶會做一樣嘢，而依家喺茶樓唔會再見到，就係有啲人會鍾意養雀，佢哋會帶自己鍾意嘅雀仔去茶樓同大家一齊分享， 所以當時除咗叫賣點心嘅聲之外，亦都會有好多雀仔嘅叫聲， 因為當時冇乜娛樂 有一啲人喺茶樓度喜歡睇報紙一睇就成個上晝， 亦有好多人喜歡喺茶樓一邊嘆茶一邊傾計成為彼此嘅交流。

香港係百業興旺嘅時候有好多好出名嘅茶樓，但可惜因為時代嘅變遷，有好多出名嘅茶樓都已經結業， 而近呢十幾年出現一啲新派嘅點心店舖，佢哋為咗吸引客人，無論喺味道同點心嘅樣貌都諗咗好多唔同創新嘅方向， 吸引唔少年輕一代喜歡 點心呢種食物，盼望呢種文化可以繼續流傳落去。

所有文章均來自於網絡或不同的作者，不代表本站立場，如有侵權或其他問題請即聯繫我們[email protected]，我們會立即處理。